ما لفت انتباهي في خطاب الشاهد البارحة قوله “كيف قبلت باش نتحمل مسؤولية رئاسة الحكومة في المرحلة الحرجة هذه من تاريخ تونس الهدف متاعي كان واحد تحسين وضع البلاد. كان عندنا أولوية هي القيام بالإصلاحات الضرورية باش لبلاد تتحسن امورها و نوقفوا التدهور الي عرفتو تونس في السنوات الي فاتت. و الحكومة رغم الوقت القصير نسبيا نجحت في تحقيق عدد لابأس به من أهدافها”.
اولا ما فهمتش آش يقصد كيف يقول نوقفوا التدهور الي عرفتو تونس في السنوات الي فاتت ! بربي على اي تدهور وأي أهداف يحكي ؟
- نسبة المديونية الي كانت 47% في 2014 واليوم في 72%.
- نسبة التضخم الي كانت 5% في 2014 واليوم في حدود 8%.
- سعر الدولار الي كان يقابل 1,7د ينار في 2014 واليوم فات 2,5 دينار ونفس الشيء بالنسبة لليورو.
- احتياطي العملة الي كان 114 يوم توريد في 2014 واليوم في حدود 75 يوم فقط.
- العجز التجاري الي كان 11% في 2014 واليوم فات 15%.
- القاءمات السوداء الي دخلنا فيهم العام الماضي…
ثانيا كيف يقول ان الحكومة رغم الوقت القصير نسبيا نجحت في تحقيق عدد لابأس به من أهدافها !
بالنسبة للوقت للتذكير هذه أطول حكومة منذ الثورة الي تجاوز عمرها اليوم 20 شهر وقت الي عمر الحكومات السابقة مافاتش 15 شهر. اما بالنسبة للنجاحات كيف نسبة النمو الي ذكرها نحب نقلو الي هيا اضعف نسبة في الحكومات الكل اذا استثنينا حكومة الباجي عام الثورة و حكومة الحبيب الصيد ! أما بالنسبة للسياحة الي ذكرها زادة نحب نذكر الي رانا لليوم ما زلنا مرجعناش لأرقام 2012 !
ثالثا وأخيرا وقت الي يقول كان عندنا أولوية هي القيام بالإصلاحات الضرورية باش لبلاد تتحسن امورها. أيه خويا ياخي شعملتوا ؟ ما هي الإصلاحات الي عملتوها في ها العامين ؟ إصلاح الجباية ؟ اصلاح الدعم ؟ اصلاح الصحة؟ اصلاح التعليم ؟ اصلاح المؤسسات العمومية ؟ اصلاح الصناديق الاجتماعية ؟ … يا خي فاش تستناو ؟ فسرولي كيف هي اولوية وانت جاي على 3 سنين وتعداو منهم عامين ومارينا شي! مالا كان جات ما هياش أولوية ؟ الاولوية الوحيدة الي عندكم هي 2019، وباش تتحرك العزائم
الصادقة كيف ما طلبت سيدي رئيس الحكومة يلزمك تكون انت اول الصادقين والباقي يجي بطبيعته.